فكر استراتيجي.المفهوم مش المصطلح
فكر استراتيجي.المفهوم مش المصطلح
بقلم د.كريم القفاش
فكر استراتيجي.المفهوم مش المصطلح
كلمة استراتيجية اتقدمت لناس كتير على إنها مصطلح نخبوي خاص بطبقة معينة من المثقفين ومرتبط بتنظير أكاديمي معقد ملوش علاقة بالواقع .
أكيد ردك ( أنا مش من الطبقة دي ولا مؤمن بالتنظير اللي مالوش لازمة ) .
ولكنى حابب أصدمك بالحقيقة : كلمة استراتيجية أصلها كلمة عسكرية. الاستراتيجية ظهرت في ميادين القتال قبل ما تدخل قاعات الجامعات
وكان معناها ببساطة إزاي تكسب الحرب بأقل خسائر، وإزاي تحط خطط وبدائل وتغير مسارك حسب تحركات العدو في الفكر العسكري:
الاستراتيجية = تحديد الهدف الكبير للحرب
التكتيك = إدارة المعركة لحظة بلحظة
يعني:
الاستراتيجية مش كلام… الاستراتيجية قرار + بدائل + استعداد للتغيير. ومع الوقت، انتقلت الكلمة من الحرب إلى الاقتصاد ثم إلى الإدارة
لكن المعنى الحقيقي فضل ثابت:
إدارة موارد محدودة في بيئة متغيرة لمواجهة مخاطر حقيقية وتحقيق هدف واضح.
لما مدير شركة بيحط بدائل لو السوق وقع أو لما تاجر يغير تسعيره بسبب أزمة أو لما صاحب مشروع يخطط للخسارة قبل الربح ده اسمه استراتيجية…
حتى لو عمره ما نطق الكلمة.
المشكلة مش في المصطلح المشكلة إننا حولناه لشعارات وفصلناه عن أصله العملي.
فالاستراتيجية مش تنظير، ولا لغة مثقفين، ولا مصطلح كبير على الفاضي .
الاستراتيجية ببساطة: تفكير مسبق و خطة واضحة و بدائل جاهزة وقدرة على تغيير الاتجاه قبل ما تتكسر فى حياتك العملية والشخصية .
واللي ما عندوش استراتيجية بيحارب معركة واحدة…ولو خسرها، خسر كل حاجة خليك جاهز لكل السيناريوهات .