بسبوسة الحلاوانى بالشربات المكرمل
بسبوسة الحلاوانى بالشربات المكرمل
المكوّنات
1/2 كيلو دقيق بسبوسه من العطار خشن مش ناعم ”
1/2 كوب سمنه سايحه دافيه (130ملي)
كوب سكر مليانة
1/2 كوب مايه
كوب لبن
2 معلقة كبيره عسل جلوكوز أو عسل نحل أو عسل كنافة تقيل
4 معالق كبار جوز هند مفروم ناعم ف الكبه”اختياري”
للشربات:
كوبايه ونص سكر
2 كوبايه مايه
1/2 لمونه صغيره
كيس فانيليا
معلقة سمنه بلدي “اختياري بتدي طعم حلو”
أول حاجه هنجيب صينية مقاس 30 و هتدهنيها بالسمنه كويس طبقه حلوه و سيبيها تجمد كدا ع جنب..
تاني حاجه الشربات “شربات البسبوسة خفيف و دافي مش مغلي نار يعني”..هنجيب حله نحط فيها السكر و عليه المايه و من غير ما نقلب نحطهم ع نار متوسطة اول ما نلاقي بدأ يغلي كدا والسكر داب واختفي هننزل بعصير النص لمونه الصغيره “لو اللمونه كبيره خدي 3 نقط منها بس مش هنحتاج كتير لأن احنا عايزينة خفيف”..بعد غلوتين كدا حطي معلقه طلعي شربات كدا و المسيه بايدك لقيتيه بدأ يكون ملزق خفيف جدا طبعا اطفي و حطي كيس الفانيليا و قلبي بعد كدا معلقه السمنه و قلبيها تدوب و سيبي الحله ع جنب خلاص..
ابداي شغلي بقي الفرن ع 200 يسخن عقبال ما نبدأ بقي ف البسبوسة لازم يبقي شغال من قبل ما تحطيها بكتير…
هتجيبي حله تحطي فيها كبايه السكر عليهم نص مايه و تفضلي تقلبي ع العين الصغيره نار متوسطه بالمضرب السلك و ايدك فيه علطول لحد ما تلاقى لونه بقي اصفر مغمق شويه مش اوي مش تسيبيه زي كراميل الجاهز الغامق عشان كدا هيمرر منك و يبوظه..لا يكون اصفر غامق شويه و بعدين بقي هدي النار خالص برضو وانتي ايدك فيه بالمضرب السلك و تكوني مجهزه جنبك كوبايه اللبن المغلي هتصبي حبة حبه لأن اللبن مع السخونيه بتاعة الكراميل بيبقى زي اللي بيفور ف انتي ضيفي و قلبي و حطي العسل و قلبي واقفلي عليه و حطي عليه جوز الهند لو عايزه
و سيبيه يهدي ع جنب ممكن تفضلي تقلبي بالمضرب السلك لحد ما يطلع السخونيه بسرعه و أول ما تلاقي سخونيته تقدري يتحملها صباعك يبقي كدا تمام
هتجيبي طبق فيه دقيق البسبوسة وتحطي عليه السمنه الدافيه و تقلبيه بمعلقه بس مش جامد و المهم بمعلقه كل حاجه بمعلقه مش ايدك عشان متنشفش بعد كدا.لحد ما تلاقي الدقيق كله اتغلف بالسمنة و بقي عامل زي الرملة المنديه كدا تنزلي عليهم خليط السكر المكرمل دا و تقلبي بس خفيف جدا جدا مش تعجني يدوب تتاكدي المكونات كلها اختلطت ببعض تنزليها بقي ف الصينيه
و تفرديها ب ايدك كويس و بعد كدا عايزه تحطي حاجه ع الوش حطي و بعد ما تحطي اتغطي عليها عشان السوداني أو البندق ميطلعش بعد ما تضيفي الشربات بعدين و تخبطي بعد كدا الصينيه ع الرخامه عشان تتاكدي أن كله اتساوي و بعدين تدخليها الفرن الرف التاني من تحت اول ما تلاقي الحروف اغمقت انا قعدت معايا حوالي 24 دقيقه لحد ما خدت لون حلو من الجناب بعد كدا شغلي الشوايه تاخد لون حلو من فوق زي ما انتي عايزه فاتحة أو غامقه كدا يعني خدت معايا 4 دقايق
بعد ما تطلعيها من الفرن ع طول تحطي عليها الشربات من سر نجاحها أنها تشرب الشربات كله و هتاخد كل المقدار متخافيش مش هيبقى كتير و هيخليها طريه… بعد ما تحطي الشربات غطى عليها بغطا حله أو صينيه و دخليها تاني الفرن و هو مطفي عشان البخار بتاعها يطري الوش دقيقتين كدا و طلعيها و أول ما تهدي قطعيها و دوقي اطعم بسبوسة زي اللي بره بالظبط و بتاعة الحلوانيه من غير بيكنج باودر
ملحوظه :الوصفه دي غير وصفه الكيس الجاهز دي حاجه و دي حاجه..الكيس بيبقى ليه طريقته مكتوبه عليه و بتحتاج زبادي…دي طريقه الحلوانيه نفسهم بيجيبو دقيق بتاع العطار السايب… تاني حاجه البسبوسة مش بيتحطلها بيكنج باودر لانها مش كيكة وانتي مش عايزاها عاليه هي هتطلع بنفس السمك اللي بره بالظبط و نوعية الدقيق مهمه الخشن بيطلعها مرمله عن الناعم تحسيها معجنه..و طريقه الكرمله دي عشان لونها من جوا يبقي غامق شويه زي اللي بره ممكن مش تعملي حركه الكرمله دي بس هتطلع لونها أوف وايت من جوا بتبقي”كبايه سكر عليه
لبن دافي و العسل و جوز الهند و تدوبيهم سوا و نفس الكلام تحطيه ع دقيق البسبوسة بعد ما تكوني حطيتي عليه السمنه “بس انا جربت الطريقتين و الكرمله احسن كتير”..شوفي الأسهل ليكي و اعمليه و بالف هنا