معلومات هامة جدًا عن تخزين و تفريز #الثوم
معلومات هامة جدًا عن تخزين و تفريز #الثوم
بدأ موسم التوم وبدأت ربات البيوت تبحث عن الطرق الصحيه والطرق التي تحفظ التوم دون فقد قيمته الغذائية وعدم تلف التوم.
أولا الأنواع المناسبة للتخزين هى اللى بتظهر فى فترة مابين الاسبوع الأول من مارس إلى الأسبوع الأول من ابريل ودى بتبقى صنفين
توم بلدى وده بيكون لونه أبيض
وتوم صينى وده بيكون لونه محمر شوية وصينى دى مش معناها أنه مستورد من الصين لاء هو مزروع فى مصر لكن اصل سلالته صينى
وده غير التوم الصينى الأبيض المستورد من الصين وبيتباع فى سلة بلاستيك جاهزة فى السوبر ماركت
هل الفرم شرط أساسي في عملية تفريز التوم ؟؟
الإجابة لاء .. التوم ممكن يتفصص ويتحفظ فى برطمان او كيس تلاجة جاف فى الفريزر مباشرة والفصوص ممكن تبقى بالقشر أو بدون .. بس اهم حاجه تكون فصوص
إحنا بنفرموا بس لتسهيل عملية الاستخدام
هل يجب إضافة خل اوملح اوزيت سواء كلهم مع بعض او اى حاجه منهم؟
الإجابة لاء مش لازم … التوم ببحتوى على مضادات قوية للبكتريا وهو لوحدوا كفيل إنه يحافظ على نفسه
طب بنضيف الحاجات دى ليه ؟
▪️الخل او الملح بيكونوا زيادة فى عملية الحفظ كنوع من الأمان بالإضافة انهم بيدولوا طعم أثناء إستخدامه
▪️الزيت وظيفته فقط تسهيل عملية الاستخدام عشان بيخلى التوم مايبقاش جامد وكتلة واحدة أثناء فترة التجميد وبكده هاقدر آخود منه الكمية اللى أنا عاوزها بسهولة من غير ما افضل اكسر وافتت فيه
الاشياء التي يجب مراعاتها ع تفريز التوم
اول وأهم حاجه التوم يتفرم ويتشال مباشرة فى الفريزر ، ما ينفعش اسيبوا فى برطمان أو اكياس التفريز بره لغاية ما أخلص كل الكمية وبعدين ابتدى اخزن … كده لونه هايتغير وهايفقد كتير من قيمتة الغذائية ومن طعمه وكمان فترة حفظه هاتقل.
طيب بعمل كده وأحيانا لونه بيتغير ويبقى اصفر بعد التجميد واحيانا لاء بيفضل ابيض ايه السبب هل كده باظ؟؟
الإجابة لاء .. ده راجع لاختلاف أنواع التوم واختلافه من زرعه لزرعه وده أمر طبيعى مالوش علاقه بفساد التوم
طيب وانا بطبخ بيه لونه بيبقى اخضر او أزرق هل ده خطر ؟؟
الاجابه لاء .. ده طبيعى وعادى جدا نتيجة تفاعل مادة الكبريت فى التوم مع الحرارة أو الحموضة لو بنستخدمه فى المخللات ومافيش منه اى ضرر.
البعض بخزنه بالطريقة القديمة فى البلاكونة مش فى الفريزر بس بيفضى من جوه أو بيزرع ايه السبب؟؟
لازم التوم يتخزن فى مكان ماتوصلوش إليه الشمس مباشرة