المكرونه بالبشاميل
المكرونه بالبشاميل
المقادير
نص كيلو مكرونه قلم مسلوقه فى ميه مغليه ورشه ملح وزيت لمده 8 دقايق
4 معالق ك دقيق
3 معالق ك زبده
معلقه ك زيت
لتر لبن
ربع كوب قشطه بلدي…اختياري
جبنه رومي
جبنه موتزاريلا
مكعب مرق…
ملح وفلفل
حله على النار وتحطي فيها الماده الدهنيه زيت وزبده واول ماتسيح نزلي الدقيق تدريجيا وافضلي قلبي والنار وسط ولما تلاقي الدقيق مع الزيت والزبده ابتدي يعمل فقاقيع ولونه يغير درجه واحده شيلي الحله من عالنار ونزلي اللبن وقلبي ولما كله يختلط رجعيها النار تاني مع التقليب وفى نص التقليب نزلي ربع كوبايه قشطه بلدي ورشه جبنه رومي ولما الخليط يبتدي يغلي من حروفه اقفلي النار وزودي ملح وفلفل ورشه جوزه الطيب وبسس كده جاهز
اللحمه المعصجه
نص كيلو لحمه مفرومه
بصل مفروم
سمنه وزيت
ملح وفلفل
جوزه الطيب
طماطم مبشوره
معلقه ك صلصه طماطم
حله على النار ننزل بشويه زيت وسمنه ونزلي بصلايه بيضه وشوحي 3 دقايق وبعدها نزلي اللحمه المفرومه وقلبي مع رشه فلفل اسود وجوزه الطيب ….وفى نص السوا زودي الملح عشان تفلفل ولما تستوي زودي معلقه صلصه كبيره وشوحيها دقيقه وبعدها نزلي الطمطمايه المبشوره وسبيها تنشف ميتها شويه …اقفلي النار وظبطي الملح وكده جاهزه
هاتي الصنيه وحطي معلقتين بشاميل فى الارضيه وبعدها تجيبي المكرونه وتقلبيها فى بوله جانبيه مع شويه زيت وبشاميل وحطي راق مكرونه وراق لحمه وراق مكرونه واخر حاجه البشاميل على الوش ….ورشه رومي وموتزاريلا كتييييييير ودخليها فرن سخن على 180 على الرف الوسط شغال من تحت فقط لمده 10 دقايق وبعد كده اقفلي من تحت وافتحي الشوايه خمس دقايق وبسس كده طلعيها تهدا خمس دقايق